هذا كلام في الريح

هذا كلام في الرّيح

الناشر: دار الوسام للنشر

ر.د.م.ك: 978-9938-9675-2-4

سنة الطّبع: 2023

 

دلّي رصاصِكْ

دَلِّي رصاصِك في البحرْ واستنَّى

         يا شِبكة البحَّار 

خلِّيتْها بين اللَّظى والجَنّة

والقلب فيها احْتار

قولولها تعلِّي كفُوفِ الحِنّه

تضوّي شموعِ الدّار

زَعْمه البحَر يكونْ واحدْ منَّا

والا البحرْ غدّار؟  

***

دَلِّي رصاصِكْ ما تخافِي عليه

نْيَاب السمَكْ ما تعَضَّه

وخفافْ فارغْ للرّياحْ ذَرِّيه

البحْر بيه يتْوضَّى

ما تضَيْقِي الحرِيرْ لا توصّيه

الحُوت ياكِل بَعْضَه

ينُوض الغضبْ والحَبْسْ ما يرَضِّيه

 تصير الأمْواج غْبارْ

***

دَلِّي رصاصك فرْحي البحَّارة

يحْيَى التعبْ و يموتْ

 ملحْ العرقْ عاطي على المرَارة

وملح البَحَر في القُوتْ

من غير حُبّكْ ها الحياة خْسارة

والرّوح في الخيُوط

ما تسْأْلِي على دقّة الصّنَّارة

رمُوشنا صُنّار

***

دَلِّي رصاصك في الغريق البارِدْ

في العرضْ زيدي الطّولْ

هاني مثيلك في الشَوارعْ شاردْ

بين السكاتْ والقُول

ناظُور بُرْطِك في الرّياح يْعانِدْ

وزرعِكْ عمَلْ سبُول

حشّوا خيالِك وقتْ شاحْ بزايِدْ

وصبّوا عليه النّار

***

دَلِّي رصاصك في برود الحمراء(*)

ودِلّي قبور الصّبْرْ

لوكان نِحكي في الغريق اش يَجْرى

يشقِّ البحَر الصّخْر

هلالين تَطلع للنجوم والقَمْره

حتّى الرّملْ يُخَضارْ

دلّي رصاصك في البحرْ وسرّه

في الوطْن يا ما اسرَارْ

 (*) الحمراء مكان من شاطئ المهدية للسّباحة والصّيد

https://youtu.be/TFAMd9Zkh9w

 

 

 

 

 

 

 

 

 

 

 

 

 

 

 

 

 

الشمعة

 

يا شمـْعةِ المُحْـــتارْ

نا نْكَحْــلِك بالنّــــارْ

وانـــتِ ذُوبي

وطَفِي ذْنُوبِي

وقولي الكلام جْهار

قولي عيُوبي

***

قولي سهــَر اللّيلْ       يِضْوي عليّ

وقصايدَه قناديــلْ       دَايــــــْرَه بيّ

خلِّـي القمـَر ذليلْ       ضيّـــع ضَيّه

والقلبْ صار فتيلْ     وسْــــــط النّار

يا شمعة المحتارْ

***

لو تعْرفي ما بيّ

ولو تعْــــرفي هَمِّ البـلادْ عليّ

كنــتِ تشــدّي الخُوفْ في عِينيّ

ويســيلْ دمْعك ع الْفتــيلْ جرّارْ

ضَيّـــعتني في وســطْ ألْف ثنيّه

وذوِّقْتني حـبّ البــــلادْ مْـرَارْ

يا شمعة المحتار

***

نا كتبــتْ شِعْر المَدْح    في الِّي يِضْوِي

وكتــبتْ شعْر الجُرْح    في الـّي يِكــوي

والوطــنْ ريشةْ رِيح    ويـــــنْ تـــذرِّي

حتى الأملْ في الفرْح    صــار غْـــــبار

يا شمعة المحتار

ـــــــــــــــــــــــــــــــــــــ تونس 1988

رابط القصيدة بصوت الشاعر https://youtu.be/9DZQvLNQkY0

 

 

 

حجرة النّاظور*

 

يــا حجْــرَة النَّاظُورْ

حِيطِكْ تهــَدِّمْ عَ الذّْرِيع والرَّمْلَة

شُوفي الزّمان يدُور

والبَحْر يَلعِب عَ الصّْخَر ويمْلى

يــا حجرةِ الناظور فاش تفَكِّر؟

عُمْر التَّعـــَب يطُول بيك وبيّ

انْـتِ تضــــوِّي والظـلامْ يسَكّر

وانـت تردّي الّرّيح ع المهديّة

يا حجرة النّاظور هاني مْثيلك

كي تْخَالْفُوا الأحباب عَ الحُرّيه

             ***  

كنتِ تشــــِدِّي الحــيط وتعَلِّــيه

بين القـبــور الميْتة والمـُــوجَة

كنـــتِ تشُــــقِّي اللـيل وتضَوِّيه

وتوَنْــسِي البحَّار وقْت حْروجه

حيطِك تعبْ وتهدِّم

وتفرْقوا الأَحـباب حجْرَة حجرة

البعض ولَّى يَحْلم

زازِ البــحرْ وقال درْجَه بدرجه

والبعـــض خاف الرٍّيحْ لا تِتبرِّمْ

كتِّفْ يديه وقال ما احْلَي الفُرجه

يا حـجرة النَّاظُور     كل الحبـايِبْ راحُوا

والِّي بقَى م السُّور    تقاسمـــوه وارتاحُوا

وَقْت الزّمان يدُور    نِتسلْــــحوا بسـلاحُه

ــــــــــــــــــــــــــــــ المهدية نوفمبر 1987

* النّاظور المطلّ على المقبرة البحريّة في المهدية، لحن القصيدة وغنّاها محمد بحر.

رابط القصيدة بصوت الشاعر

https://youtu.be/keDarrNEEww

خضراء

ما زالْ عودك أخضَرْ…. 

وما زال صَدْرك للهوَى مَحلولْ

ما زلت فيك نكّبـــــرْ...

بنيت القصرْ وساكنَه مَجــــهولْ

***

تو نعْشقِكْ ما زالْ بكْرِي عْلينا      

وما زال عنْدي في الهَـوَى ما نْقُولْ

وتو نزْرعِك نجْماتْ في ليالِينا        

ونطَلــــعِكْ قبْل الحــصاد سْبُـــــولْ

وتو نَسْمْــعُوا يا ما يقولوا فينَا           

يصُب الكلامْ قَطْراتْ واحْنا سْيُولْ

***

توْ نَعْشــقِكْ ما زِلْت عندي صْغِيرة

وتعرِفْ طريق الحب ياما يتلِّفْ

ومازلتْ نحْبو في الهوَى والغيرَه

ومن صُغْرتي تعلِّمْت كيفْ نوالِفْ

جْنــــاحِ السْفَرْ نبِتْ في البْحــِيرة

والعمر يفْنى وعِشْرتِك ما تزول

***

تو نعشقك في المُـــوجْ يا بَحـرِيه                  

ونكـــونْ رايِس في البحرْ نسَـطَّرْ

يهيج البـــحر نِرسُو على المَهديه              

ونســــــكْنِك في بُرجْ كان مْسكّرْ

علاش ساكْنِـك وانتِ بعيدة عليَّ؟         

والقلـــــبْ حيْ، بجُــــثتَه مَقتول

***

تو نعشقك في جبال عين دراهم          

ونِكـتبْ كلام الحبْ فوق جْبينك

نذوّبْ نــــجوم اللّيل من سماهُم               

ونكون لك أحلي قمَر ونْزينــك

وهــذي القصايد عهْـد تو تلقاهم                    

فوق الجبين صْداق خَطْ عدول

***

تو نعشقك في القمْح في جنـدوبه       

وتو نعْصرِك من شهْد سكر باجه

وتو نرفـــعك فوق الكتف مَهْيوبه                 

وأعظمْ ملَك في يديك يِحني تاجَه

ومهــما تعب القــلبْ ع المحبوبه                

 تزيد المحـــبَّه عِز كيــف تـطول

***

تو نعشـقك، في الحُب نا عَرَّافْ         

ونقرا كفوفِك، قمْرتك ونـجومِك

ونكـره الحُب بالرَّشْو والاكـتافْ           

وبالـــواسطة ما نَطْلــعَه سلُّومك

شفــــتِ خيالك في جبال الكافْ                     

 ما رضا يبقى واطي على سهول

***

تو نعشــــــقك حتى يقولوا هبِلْتْ           

 ويِنســابْ شيبي مُوج فوق بْحَر

ويغِيــــر مِنّي الشّطْ في بنزرتْ             

 و اذا عطــشتِ نكون لك مطَـرْ

نســـكنْ سحاب النَّوْ مهما دُرتْ            

 يصِيرْ البحـــرْ بنَــدْوتِي مبلُول

***

تو نعشــــقك ابْكِي عليّ بغــصّه                    

تراه جَرْبي مـــثل المْـــرا حِبِّيني

لا بخُــورْ محرِزْ يحكيلكْ القصّة 

ولا الورْدْ من ارْيـانْتِكْ يكـــفِيني

عطشان راني كي جَمل المَرسى              

ونسمعْ امّيَّه تخُبْ عرْضْ وطُولْ

***

تو نعشـــــــقك بالرّوح انَا شرِيتك        

قــــدرِك عْلا ما يِحـــــمْلَه مِـيزان

نزِّيــت عَرْقي مالعـطَشْ روِيتك          

وانتِ تخـــــبّي الماء في زَغوانْ

وْحقِ العَرْضْ والأرْضْ ما ضَرّيتِك           

كفُويَا نكونْ من جنْتِك معْزُول

***

تو نعشــقك في ذهَب رملِةْ نابل      

وروح الزهَرْ يصُبْ قطرة قطره

واللِّيــم هابط ع الصــدَرْ يتمَايل         

نعدّي معاهم سهْرْتي والسّكرة

وعالشَّط مرْمر في الشمِيسة يقاتِل       

 وانــا القتـــيل وقاتــلي مَقـــتُول

***

تو نعـــشقِك عاشـقْ خْيال عرُوسه              

بين الغمَــام رْحَل بيــها وطارْ

في القلبْ حُرَّة في الهوى محبُوسه         

وفي الرّوح توقِد سِرْها والنَّار

ثمّــــاش أغْلى من سْوالفْ سوسه                

وثمّاش أحلَى من كلام مهْبول

***

تو نعشــقك ونكون بيك وَلْهان             

ونصـــبح إِمام الحبْ للعاشقين

نعلِّيك صُمعه تطل ع القِرْوان              

 ونسـكنكْ مِحراب في العينين

حبُّــكْ الجَــنّة، الكُفْر والايمانْ

 وحبّك الجِنْ، الفكرْ والمعقول

 

***

تو نعشقِك في هِيبــتك والهانَه                       

ولِّي عشقْ ما يفَرِّق الحالتــين

ما تفْــــرحي اذا زهَت سليانه

و ما تَحْــــزني اذا بقـينا اثنين

علاش خايفــه من عـشق قلبي انا

ربيعي صدق من بعْدْ شِحْ فصُولْ

***

تو نعشـــقك فلاّحة القصرين                       

ع الصّبح تسري للوطن تِبنيه

كالشّمس ديما مفتحه ذراعين              

تزرع حبــوب القمـح وتربِّيه

ونَطبع البوسة لْفوق م الخُدّين                

 ترميك نار الحب في المجهول

***

تو نعــشــــقك نوَّار في بُوزيد 

يبني النــــحَلْ الشّــَهْدْ فوق زْنودِك

 والورْدْ يطـــلَعْ كل يومْ جديد

وانت العسَلْ والعطْرْ مالي خدودك

كيف عارفة ما عاد هجر يفيد      

علاش تقتلي في الحب بالمَرْسُول

***

تو نعشــــقك عِشق السَّمَا للطِّيرْ  

عشق العْـــــزايز دِينــهم مِتْحجِّرْ

نبــني عليــــك رْبَاطْ في المِستير

ونلِمْ وِلْيِـــةْ حـــضْرْتي تتْـخــمِّر

عنـدي طريقة عمرها ما تحير

 قُـــدامها رُوس المُلوك تزُول

***

تو نعشقك و نوَنْسك في صفاقس          

ونظلِلكْ طول الطريــقْ ونضمِّك

مطْبُوع حُبِّكْ طبْعْ حنّة قابس 

خضرا وحمرَا كي خدودْ رمّانِكْ         

ها الوقت واقفْ في غرامك حابسْ      

مهما الطريق صعبْ عندي حلول

***

تو نعْشــــقكْ جرْبَـة عليّ تنــادي

وتقُــــولْ يا مِدْنين حلِّي عــيونكْ

من خان تـــطـــاوين خانْ بْلادي

وتكـسْرَه جرْجـيس في زِيــتُونكْ

وكـــلْ من نوالكْ شرْ والا يْعَادِي

يتـــحشْ زرعَه و ما يدير سبولْ

***

تو نعـــشقك يا مرمده في رمادة          

 ويا ذاهبه من شيرتك في ذهيبه

كنـــت عزوزه وداخــله عــواده         

صُمت دهور وفاطره على زبيبة

و انا شــريْتك بالذّهــــــب قلاده             

عقد المحبّه ما يــجي كشــــكول

***

تو نعــــشـــقك اذا النـخلْ حمِلْ           

 وضوات توزر زانها العرجون

ومن قصر قفــصه نحْمْلِك للظّل            

 ونســــكنك في ساحل الزّيتون

و اذا يقـــولوا ها العشــيق هبِل    

 يضيع القضاة فْ حُكم ها المهبول

***

تو نعــــشقك والعشق فيه الحُوز         

وفيه التـــــعب والمرج والتفكير

والشـــــّوك فيه وفيه زهر اللّوز            

وفيه المــــطر والرّعد والتّكسير

وفيه الـعنـــــاد مثيل نخـلة دوز              

وجه الســــماء قدامها   محلول

***

تو نعشــــقك ع الحب ماني مولِّي           

عشق الصحاري للرياح تنوِّح

لا حُبْ بعدي ولا حبيب من قَبْلي       

 كيف ينْجرح يسامحك ويفرَحْ

من قالـــــك نا كرهت فيك قْبِلِي            

 ومن قالك هوّنــت فيها القول

***

تو نـعشــقك، بالشِّعر فيك نسوِّي        

دُسْتُور حــبْ نوزْعَه على النّاس

هو السْـــمَا هو السّـــحابْ ينوِّي

هو الغْـطاءْ والحضنْ هو السّاسْ

ماهــو غريب نجيــك للمــتــلوّي       

 لكن غريـبْ الوقْتْ بيَّ يطـــول           

***

تو نعــــشقك زيتون طاح سوالف          

 ويديـــــــن لَلّة في الغـــصان تلِمْ

لاني ذليل لا طمعت فيك لا خايفْ        

 ذلّ المحبة يصيـــــــبني في لْجَم

لا الكاهنة ولا الرّوم ذلوا السّالفْ          

واكتـــــــاف بابا علمْ فوق خيـول

***

تو نعشـــقك وباقي عليك نخاف         

 ونخاف منِّك خوفْ ما طاوقته

هزّيت حِمْلك فوق م الاكْتــاف           

 ولمّــــيت بحر الشَّابَّه وشرَبته

ماني بعيد نجيكْ لقصور ساف             

 و سِيدِي عَلْوانْ للطَبْل والخيُولْ

***

تو نعشقك والقلب شورك نادى           

 هز البـرادعة، رجْها وزلزلها

هُم يعــرفوني دِرت فيك عباده            

وكلمة السّو نا عشــت نتحملها

ومن قال قبلي لا نبي في بلاده            

سكـــر الباب وما بقى ما نقول

ــــــــــــــــــــــــــــــــــــــــ تطاوين 1990

رابط القصيدة بصوت الشاعر https://youtu.be/3aQ_edRDoGQ

 

 

 

دمعة

ما زالْ دَمْعَه يتِــيمَه       وصَفِّ النعُوشْ طْويلْ

البــلادْ في البَــرّيمه       ودَمْ الوجِيعَة يـسِــــيـلْ

يــا ارْضْ يا بكَّــايَـه      هِــــزّي الحمِـلْ مـْـعَايَ

ها الحِمْلْ صارْ ثقيلْ

***

حبِّيـتْ نبْــــكي ما لقِيــتْ دْمُوعِي    

وحبِّــــيتْ نَفرَحْ ما لقـيـتْ شمُوعْ

وذلّيتْ روحي وقلْتْ هذا ربيعي

ضاعْ وجْهْها بين السُّـجودْ ورْكُوعْ

نشــوفْ التْرَاب مِتحيّرْ     والرِّيــحْ فيـه تذرّي

طبْــــــع المودَّه مغيّـــرْ      وطولِ السفَر يهَرّي

مهما القَدَمْ مشّايَه         

***

كانتْ بلادْ في بَالْـــنَا نحمِــيها     

من لَســعةِ السّمسارْ والصّرّافه

صارتْ ديارْ و يمَامْها ومِفـتِيها   

يِتْعارْكوا على الدّيــن والخرَافَه

سُـوق التَّجَارَة وافِـي       كل يــُوم فتْنَه جديدَه

الشَّعْب يِجْــرِي حافِي      وماهوشْ لاحِقْ ايدَه

ولا الصَّبر ليه نهَايَه

***

عارفين حُزنكْ خاطْركْ مَكسُورْ      

وشـايفين فيك الدّاء وما ندَاوُوه

مثيل البـحرْ فـوق الصخَر منثُور                   

نقـولو كلامْ ما نقْــــدرو نلِمــُّوه

ما عاد فيـــــنا رُوحْ       ولا عقلْ بيـه نفكَّرْ

لا طريقْ وين نروحْ       باب الأملْ تســكَّر

كان الدموع جرَّايَه

***

عارفين قدْرِك غالـِــية وعزيزَة

وحاسِّينْ بيك وفي التعَبْ تْكَــابِر

جرْحِكْ غرِقْ يصعِبْ على الغريزة

وريش الحرامْ بين الجوانح طايرْ

خايفين لا نَنْساكْ        والــذّاكرَة نسَّــاية

والحُزن لا بكّاك        يصير البْكا غنّاية

يا ارض يا بكاية

ـــــــــــــــــــــــــــ المهدية 2020

 

رابط القصيدة بصوت الشاعر

https://youtu.be/IbjRtlDPVmU

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

حيرانة*

هيَّ واقْفة

تِشغِلْ قْلوبِ النّاسْ منْ وَقْفِتها

وهيَّ خايْفة

لا يألْفُوا حْكاياتْ ما عَاشِتْها

وهي شايْفَة

أَصْلِ الكلامْ يدُورْ في ساحِتْها

وهي عارْفة

إذا مشَتْ، يِمْشُوا وْرَاء قامِتْها

***

هي واقْفَة حيْرانَة

وَقْفِةْ غْرِيبْ وضَاعْ بين ثنَايَا

لا تظُنْها فَرْحانَة

و لا هيّ حزِينةْ حالْها بكَّاية

ما يْهِمْها في النَّاسْ واشْ يقُولُوا

وما يهِمْها قُصْرِ الكَلامِ وطُولُه

هي واقفة طال انتظار وصولُه

و مِتلَهْفة

***

هي واقفة تردِّ السّلامْ

......ما سلِّمِتْ

             و تْكلِّمِتْ

سِأْلِتْ على الّي ضَاع منْ يدِيها

سَالِتْ على خدِّيها

دمْعاتْ فُرقَة والسّماءْ كي غيِّمِتْ

هي غمْضِتْ

 عِينيها

و تخيْلتْ

عصافِر بابْ بْحَرْ فرْحتْ بيها

ومرَفْرفة

***

هي واقفة

والرٍّيحْ، ريحْ خْريفْ هَبْ علِيها

نزِل المَطَرْ قطْراتْ فوقْ شعَرْها

وتْبَللتْ ظَفراتْ

والقلبْ ناضْ وخاف تَحْت صْدِرْها

والِّليلْ حَسْ جراحَه

خافِ الشَّجرْ مِ البرْقْ

ونْزِعْ ثوبِ الوَرْقْ

ورْمَاهْ وسْط ألسَّاحَه

والنّاسْ هزُّوا كلامْهُم وتفَرْقُوا

كلْ طِيرْ لمْ جنَاحَه

وهي واقْفَة

والوقْتْ يلعِبْ بِيها

هي خايْفَة.... لا حَدْ طلْ علِيها

ـــــــــــــــــــــــــــــــــــــــــــــــ تونس 2010.

* لحنها وغنّاها محمد بحر وترجمت الى الفرنسية والالمانية.

رابط القصيدة بصوت الشاعر

https://youtu.be/D3yGxRg5-8M

 

 

 

 

 

 

 

 

 

 

 

 

 

 

 

 

 

هذا كلام في الرّيح

 

***

***

***

 

***

***

***

***

***

***

***

***

***

***

***

***

***

ـــــــــــــــــــــــــــــــــــــــ المهدية 1997

https://youtu.be/o0H8bKn

 

 

 

 

 

 

 

 

 

 

 

 

 

 

 

 

خيبة

لمِّيـتْ بحــرِك من غضبْ امْواجَه

وحضـــنتْ شطِّك من رملْ ورِيحْ

وشيِّدْت قَصرك من رخامْ ابراجَه

وانتِ رضيتِ كلْ شي يطيحْ

***

لْمِّيت عمري في نهَار المَلقَى

عُمر المحبَّه قْصير

خُطْواتْ تِجري بين فرْحه وحَرْقه

والقـلب بيها يْطِير

مرّاتْ ننْسى الرُّوح في مَلقاك

ومرّات ما نلْقـاك

نتـــخيْلك بين الضلوع طَلّيت

***

لميت عمري في هواك بْديتَه

والقلبْ بيّ طايِر

الحُـــبْ فوق الأرض آنا بْنيتَه

والحُب مِنّي حايِر

قداش نُصْبر في غرامِك نِتعبْ

ونسامـحِك وتزيدْ منِّي تُهـرب

نتخيْـــلك بعْد الغــضب هْـفِيت

***

لمّيت كُل اوْراقِي

وكتبـــتْ لك أحْلى الكلام الباقِي

وصّيتْ ورْدي يُحْضنك ويودِّع

وعلّمت عِيني تدْمَع

وتقولك مانا سببْ بكِيتْ

نا قلت لك ما رِيتْ

الا التعَب في عِشْرتك،ما ترجَع

مِتْخيلك من فُرْقتي تِكْويت

رابط القصيدة بصوت الشاعر

https://youtu.be/odZIEYmE1cQ

 

الطريق

 

تطُول الثْنِيَّه والقدَم مشَّايَه

كُلْ شَيْ لِيهْ نهايه

الا الكلامْ في كُل يوم حكايه

***

طريقْ وجْــهَه خـافي        والخطَـــاوي اتَّبِّــــعْ

وقلب العشـِيرَه حافِي        على الجَـــمرْ مِتربِّع

خوفي عليك يا خُوفِي        كُثر الطّــرقْ تضيّع

في كلْ دورة عثْـــره         بيــها القدمْ شكّـــايه

***

طريــقنا نِمشُــــوه         خَطــوة تهز الخَطوه

بأوّلْ قـــــدم نَبـدُوه        والضّعـــفْ يولدْ قُوّه

وإذا المــطر شربُوه      يعود الخريف ونَزْرع

ومهما الجــبل علّوه     على رموشــنا تَو نَطْلع

يطول الطريق وخُوه     في كــلْ جــهة نهــايه

***

خطاوي الأهالي واقفَه      في مفْـــرق الـــثنـايا

ولَيَّــــام ماهي رايـــفه      في بــلادنا هَطّــايــه

ديما عيـــوني خايــفه      عـلى الوَطَـنْ بكّـــايه

رغم الخُــطب الزّايفه      فـي كـــل يوم حـكايه

تمشي وتبقى تالـــــفه      تصير الخـطبْ غُنّايه

***

اذا الطريق يوصِّلْ         فوق الحجر والشُّوك

احـنا عليـــنا نكمِّل        وحصانْهم مبـــــروك

وين الســـفينة تقبّل        بشْراعها المنْهــــوك

كُثر الرياس يوحِّلْ        وتبقى الشّمس ضواية

ـــــــــــــــــــــــــــــــــــ المهدية 2010

رابط القصيدة بصوت الشاعر

https://youtu.be/6SRrgGtg2-Q

 

 

تونسْ تخربِتْ

تونس تخِربِتْ يا ذْراري الحضْبَه

ما بِين كَبّه وكَبّه  فــاح البخــور ما عاد ما يتْخبّى

***

تونس قدرْها تشلِّكْ

وخـــيالْها بين الثـــنايَا طــرُوفْ

ما بين طَلْقْ الصّرْف والحنيِّـــكْ

تمشـــي لتالِي والحزام مرخُوفْ

لا عــاد تنـــفعْ زكـرتِكْ يا بريِّكْ

ولا يفـيدْ في الجِـيِفْ حكْم الطُّبّه

خوذ الكـلامْ اخلِطْ عليهم عكْعِكْ

فحّـجْ مع الأخْرين فوق الخـرْبَه

***

فطيرة وطاحِتْ على جــــواعَه

البريمَه فيهمْ حمّالْ

جنْــدي واستصينْ في الطّاعَه

وكل عام يعلّقْ قْرادْ

طلِّـــق، ناســـبْ الطّمـــّاعة

مزيانة وعِجْبــــتْها اللِّعـــبه

حـــرّك اذيَـــالَــه وصُـنّاعَه

علّمْـــهم فنُـــــون النــّهْــــبَه

***

مخْـــرُوبَه تونس عالرّابَعْ

مضروبَه تحــــت الحزامْ

قلت ْلكم من يـــومِ السّابعْ

مـــازالْ الخـيــرْ لقـــــدّام

هاو جاكُم في شهر التّاسِعْ

متحزِّمْ داخل في الحسْــبَة

وارثْها تونس بالطّـــــابَعْ

لهِفْ قرطاجْ وزاد القصْبة

ـــــــــــــ البرادعة 1991.

https://youtu.be/lkVcfTgZI38

الأرض

الأرضْ قالتْ يا جبَل تْكلِّــمْ

واشهدْ عليَّ ما بنِيتْ لنَاسِي

قال الجبل ملِّيتْ وانت تَعلِمْ

لا ريحْ تهْدا لا شجر يوَاسي

كل عام تِذوي شَجرَه

***

قال الشجر نا غريبْ وسْط بلادي

وصبحْت خايِفْ من دوَاير ظِلّي

والحلم يكْبِر والسفَرْ ينادِي

ضيّعتْ ورْدي وما قدِر يولِّي

عُمرين ضاعوا وضيّعتنا الهجرة

وانت ذبلتِ وما رجعتِ خضرا

يا ليعتي م الهجرة

****

قال الجبل ملّيتْ

قال الجبل يا ليتْ ما تعلِّيتْ

طول العمرْ عانِدْت وهْج الصَّحرا

وشربتْ دمْعي مالعطشْ روِيتْ

طاح الورَقْ والطّير خلَّى وكْره

حَرقة وحُرقة ومالهجر تِكْويتْ

يا ليعتي م الهجرة

***

طار الحمام ما سلِّمْ

والرِّيحْ صارتْ في الجبل تْكلّمْ

هِز الغطَاء على جبْهتك ورِّيني

محْفور اسْم الطِّير فيك مْوشّم

الفينْ عامْ وصُورتَه في عينِي

ربِّيتْ ريشَه من وجع الغَسره

يا ليعتِي م الهجرة

رابط القصيدة بصوت الشاعر

https://youtu.be/gZI2OzrwcDY

وهم

 

كوني كما لَيّام مّه بمرّه

مَرّه تلومي عليّ

ومرّات خلي القلب بين يديّ

مهما تعب العمر لازم يبرى

***

 

كوني كما لَرْياح، مره اشتدّي

وتــسللي بين الضلوع وتهدّي

وتعلمي ظلم البشر

وتعلمي صبري عليك وعدّي

ما ذقت منك مر

وانت أدرى

***

كوني كيما تحبّي

يوم ابْعْدي ويومين عِيشي حُبّي

ما نعاتبـك هي الرّياح وطبْعـك

يتغيْروا كالشّمس يوم خريف

ساعات نشهي دمعِك

وساعات قلبي في هواك حفيفْ

وانت صحراء

***

كوني بسمة... يِرطاب بيها الخاطر

كوني كلمة...  يعطف عليها الشّاعر

وتلحفي باللُّغز اذا قربتِ

و اذا هربتِ

نتقابلوا في الحلم...كوني الوهْم

عز البحر ما تعرفيشي سرّه

رابط القصيدة بصوت الشاعر على اليوتوب https://youtu.be/fdWbfmS6_rw

 

 

ما تضربوش بلادي

ما تضربوها بْوَرْده

ولا تسَمْعوها كلامْ ما يتقال

هي صابره من مدّه

صبر اليتيمه وما لقات رجال

لُو تسمعوها تِبْكي  

ولو تسمعُوا البحر ليها يِحكي

يا صابره على الضّيم زايد تِشكي

حُرقةْ دموعك ما تغيّر حال

طاح الكتفْ علاش مِش تتّكي

حتى الكلام ما عاد ليه رْجال

***

هي صابره على العِلّة    

وهُمْ رضعوها في الحليب مذلّه

في بالها الأيام مُمكن تَحلى

وتطلع شوية شمس م الاجْبال

دور البلاد منِ الشْمَال لقِبْله

ثعلب وذيبْ ما يشبهوا لرجال

***

هي صابره كالعاده   

صبْر العزوزه و زغْرطُولها زياده

حطّولها في العُنق قالوا قلاده

و حنّولها و جابولها طبَّال

ظُهرت مشنقه في الكرومة شداده

عروسه خساره ما لقَت رجال

ما تضربوش بلادي      

و ما تخربوش العش، ليه اولادي

قولوا شبيه الطّقس جايْ رمادي

والشمس تطلع كل يوم بحال

ها الأرض فدِّت من كلام الصّادي

ونادت عليكم: متين تبدوا رجال

 رابط القصيدة بصوت الشاعر https://youtu.be/mIIisVL3L0Y

ريبيرا*

لو يقدِّر ربّي وتسافِر 

 وتفوتْ حلق الواد

ماذا تلقى ناس تساكر  

ذيبّة موش العباد

--

الِّي ما يحكُوشْ عليه  

داروا بيكْ ودارُوا بيه

قالوا الخارج تو يعطيه       

فلوس بلاش عداد

نمشي لبسبوري ونجيه           

 ونشق الابعاد

---

بعت الي قدامي وعندي 

والباقٌي من وَرثِة جَدِّي 

سنين الله نْكالِي وَحْدي 

حتّى كبِر الزّادْ

زعمَة غَدي نبيع الهِندِي   

الكَابيتَال يِنْزادْ

---

صارت ليلة في البابور  

 واتى نوْ  و رَاســي  يدُور

صبحتْ كرشي كيف الثور     

نتقرع  ردّاد

 قدام عربي مع صبنيور        

مْلَمَّه بالمِيعاد

---

هذاك على كرسي خانِسْ  

وهذا متَّرْكِن ويقــــــالسْ

يا حليله موشي مستانس       

ما طاقش القعاد

مترهوج شاربْ ليسَانسْ      

يرَى رجليه بعاد

---

مالمرسى يدوّر ويجدّف      

 و من أَوِّل قُمّامة يحلف

 يحلف بالكاسْ و يتكتّف  

سرح بلاش قياد

يتفُوخر ع الناس ويُصرف  

جندي وزادْ قْرْاد  

ــ

عامل روحه يعرف يحسب 

و يفكـــــك الكتاب و يكتب

طالــــيا بقرة وناوي يحلب  

فكرة موش عناد 

صاحبنا على النقرة يجدب    

والأحمر وقَّاد

ــ

وصلنا وقت الفجر فاتْ     

 عملنا قهوه وسويقرات

استنّينا الكار تعبّات      

بكلها أولاد بلاد

تقولش ماشية للسّعفات  

والا لبير عبّاد

ــ 

من ثمة قصدنا ريبيرا      

  قالوا فيها الخدمة كثيرة

كل عجنة لازمها خميرة     

وما تكونش نشاد

كل واحد عامل تفكيره       

عنتر بن شداد

ــ

قدفتنا الكار وسبّتنا      

 ولو تلقى في الوادْ رمَتنا

متخــــــلّط ريح صبابطنا       

ودخان الجبّاد

 الكيّاسْ ما طاقش خطوتنا     

عيط منكم فاد

ــ

مشينا و رتِحــــــْنا و ملِّينا  

 صار الصّاك تكركر فينا

لا لقيــــنا من يسْخف بينا     

تقول جايبنا الوادْ

يقيـــسوا فينا من رجــلينا     

يحسابونا جراد         

ــ

استنِّينا في البَارْ للمِغرب    

حتى طلّوا جماعة يَعرِب

سلـــيّم والساسي والطّيب   

والبحري وحماد  

قلـنا البرادعيـــــة تنسب       

الباقي مالابعاد

ــ

هزونا بالعيـــن ورُّونا               

عملوا الحسبة مقرونه

مرْكوا في الكَرني ماعْطُونا  

وزادوا في العدّاد

ضيافتنا ساعة بلا مونه  

وفاضل في البراد   

ــ

عالدّخلة ضربتني الحيره    

 لا سريِّر فيها لا حصيره

فراشي قولوا كيف نديره     

قالوا يزّي عادْ

كردونة والا قصديره       

و ما عناش وساد  

***

صاكي صاكك يا دِبّير     

 اتوسِّد دبَشك لا يْطير

خوذ ذريّع م البِشكير   

و ما تكــــونش جبّاد

وإذا نومكْ فيه شخيرْ    

تلقى الارضْ وسَـــاد           

***

قالولي من عندك هات      

 حتى خـبيّر ع البنات

حكيتلهم علي تشرات     

بالسوق و الزيّاد

 والي بارت والي زنات  

وهربت بالقياد

***

كل واحد عاملي مهفْ   

 يعرف كيف ياكل الكتِفْ

يكون ذيب و ما يتَّعرَف   

بوجادي وبو جاد

حتى على الكابينة صفْ   

و الداخل سقّاد

***

شكبّه دارت عُقب اللّيلْ         

حاره شرابْ وطُرح طْويلْ

يخرج فيها حسابْ ثقيلْ  

و تتغشِّش الاجواد

و اذا بدا الدّم يسيل    

المركز فيه رقَاد                             

***

ناري على أمي وتعبْها    

 وناري كيف باعت ذهبْها

طـارت البسيــسه ورطبْها    

والزِّيت الوقَّاد

في ليــله ولى صاحـــبها      

مقرونه بلا زنَاد

***

صــباح الخير يا سنيور         

و اذا ما فهمتِش بُنْجُور

معَاكـــــش نهيّر لافور       

راه وخيِّك فاد

ثلاثة شهور وانا ندور   

تعتعني القعَاد

***

علي ويخـــدم في الكنتول  

 بات يكمبس في المَعقول

غدوة نكــــــمبن للمهبول     

عليّ ما هوش سَاد

وين دمّك وين همّك قول   

خيار العيشة فراد

      ***

هذا ناي اش صار علي              

حكيتلكم باقْرب ثنيه

وسترتْ على النّاس مزيّه  

وعلى برشة اوغاد

فضايحهم  في كل عشيه    

وشقْ وجاوِي ودَادْ

***

لو يقدر ربي وتسافر          

 وتفوت حلق الواد

ماذا تلقى ناس تساكر       

  ذيِبّة موش عباد

ــــــــــــــــــــــــــــــــــــــ إيطاليا 1981

رابط القصيدة بصوت الشاعر

 https://youtu.be/48X-4hHAY9g

 

علي حيوطك *

عَلِّي حيوطك علِّي 

ما نطيقشي نرقاها

الوردة طالت خلّي

خلّي عيوني تراها

***

يا زارع الياسمين

يا حابسَه في دارك

نا شايفَه بِالعِين

مهْما تعلِّي اسوارِك

ومهْما سقيتْ سنِين

وهديت للّي زارك

مشمومْ ع القرنين

لازم يروح ويخلّي...

 ***

 سجّلت أرضي كتاب

بكلام ما يتقالش

ما بين نابْ وناب

فرع الياسمين ما طالش

سرقوا عرَقْ الاحباب

يبقى الترابْ ما يسالش

يصب المطر وينوّر          فُل الديـــارْ الكــل

خَلي الغريب يتصوِّر        هزّ الرّحيق ورحَل

ما يعرفوا الفلاح

ما يعرفوش الغابة

يدوّر الارياح

ويثُور بعد اتعابه

ويرجّع البستان في وردته متجلي

علي حيوطك علي

ــــــــــــــــــــــــــــــــ المكنين 1992.

* لحّنها وغنّاها محمد بحر

رابط القصيدة بصوت الشاعر: https://youtu.be/jxFiLfriHrI

 

الحال*

 

عْلَى حــــالْنا يا ناسْ      ما تلُومُونا

بعد الِّي بْنينا السّاس      وين رمُونا

*** 

حال السفينة تنوحْ   والمُوج فيها يلوّح

لا ضاعت الرّياس وين تروّح

ويا هل ترى البحار يحل عيونَه

***

حال الي كدْ بعرقه

وسرقوه أولاد فلان جهار ودرقه

يا ليعة الفدّان منْهُ سِرقَه

والي خصى الرُّمَّان والزيتونه

*** 

لا تقولوا لاش غَنِّينا

غنّينا م الدّمّار والغبينه

لا كان علِّي صار  احنا بكينا

شُفنا دموع الحُزن ما فادونا

لا حد قال علاش       نِمْشُوا لْتالي

عوّلنا عالشّواش         زدْنا الوالي

وعلاش ما طلعناش     حتَّى جْبالي

والغرب قالوا ......م القمر شافونا

على حالنا يا ناس ما تلومونا

 

 

* لحّنها وغنّاها محمد بحر وفازت بجائزة دولية1988

رابط القصيدة بصوت الشاعر

https://youtu.be/O054F1MPi4Y

 

 

 

 

 

م